|
حالات حضرت ابوالفضل(ع) ای آدی اولان دردلره درمان سنه قربان گلدوک قاپووا قیل بیزه احسان سنه قربان گلدوک قاپووا باخ بیزه مولا سنی تاری نسگللروه ایلییروک ناله و زاری سن سن ائلین شیعه لری غم گونی یاری ساخلار سنه یاس ملت ایران سنه قربان دائم سنه گوز یاش الروک بزم عزاده سو گورسک هایاندا سالاروق اصغری یاده اولدون او سودان اوتری خجل کرب و بلاده گوزلری یولون غمزده طفلان سنه قربان بیر مشگ سودان اوتری اوگون قانه بوروندون اوخلار هدف ائتدی سنی هر سمته که دوندون امدادوه قارداش یتیشن وقته سوروندون سسلندی حسین ای مه تابان سنه قربان سن بیل او چولون تشنه اوشاقلاری ابوالفضل صولموشدی سارالموشدی دوداقلاری ابوالفضل گل سال یولا ایندی بو قوناقلاری ابوالفضل گوز یولدا قالوب هامی پریشان سنه قربان عالم سنه قربان اولا صاحب کرم عباس سسلردی سنی بیر گونی اهل حرم عباس لطف ائت بیزه ده ای قولی تندن قلم عباس دوندر گوزووی مجلسه بیر آن سنه قربان سن مایه ی فخر اولدون آنون ام البنینه امداد ائلدون سخت زمانینده حسینه وئردون ایکی قول بیر گوزووی دین مبینه ائتدون اولاری فدیه ی جانان سنه قربان یاننوق او زمانه گل حسین صوتون اوجالدی یت داده دئدون لشگر آت اوستن منی سالدی گلدی سنی اللردن حسینون اوزی آلدی تاپدون دئیه بیللم تزه دن جان سنه قربان اگلشدی باشون اوسته اول آچدی حسین باش گورمیدیم ابوالفضل دئدی باش یاروی ایکاش قویدون نه چتین وقتده کمک سیز منی قارداش دور یاتما قوم اوستونده لب عطشان سنه قربان قویدی باشووی قوملارین اوستن دیزی اوسته دردی سینووین اوخلارینی دسته به دسته بو اوخلار ائدوب سسلدی قارداش سنی خسته اولدون ره قرآنیده قربان سنه قربان اطرافیمی بو کوفه لیلر گور نه آلوبدی باخ گور نه حسین اللری قوینوندا قالوبدی دوتمورسان الیندن دئموسن هیچ قوجالوبدی یا یوخدور الون اولما پریشان سنه قربان زینب خبر آلسا او گل یاسه نه گلدی ئولسون باجیسی آتشین احساسه نه گلدی قیزلار دئسه لر گر عموم عباسه نه گلدی کئچدی دیه بیللم نئجه قولدان سنه قربان یومدون گوزووی طایفام ائلیم سیندی ابوالفضل پی دن داخی قصر املیم سیندی ابوالفضل آتدان یخیلان وقتده بئلیم سیندی ابوالفضل ائتدون دیزیمی بو غمه لرزان سنه قربان بیر عدّه هراسانیمه بو نوعی دئدیم من چوخ آغلامیون سسلنور عباس گئدیم من ایندی سن اوزون سؤیله نه نوعی قییدیم من ایلور حرمیم ناله و افغان سنه قربان آچ قانلی گوزون قارداشووی غصه یوروبدی سینمیش قوشونی باشوون اوسته اوتوروبدی دوشسون او بیلک لر که گوزوه یاره ویروبدی دگمیش گوزووه زهریلی پیکان سنه قربان دشمن یوراجاق غصه لی اولدوزلاری قارداش ویرانه ده ساخلالار اوغولسوزلاری قارداش قمچی ویرارلار مله شن قیزلاری قارداش یولدا قالار اوچ سینده جیران سنه قربان سن ئولدون ابوالفضل منیده تنگه سالارلار اهل حرمین خوش گونونی الدن آلارلار باغلارلا قولون زینبی شامه آپارارلار طعنیله اولار سینه سی سوزان سنه قربان باتدون قانا سن ای خلف حیدر صفدر بیر مسئله بو قومیدن اولدی منه اظهر قیزلاریمی هم زینب و کلثومی دوگرلر سسلر سنی داده عزیزان سنه قربان اودلی سؤزولن بیرده یانان قلبی آلیشدیر دشمن گولوشور یاتما منی بیرده دانیشدیر موجه گلن آلامیمی عباس قاریشدیر سن سیز ال آچور اوستومه عدوان سنه قربان گوز یاشیمه قلبیم قانی بو غمده عجیندی بیلسه یخلوبسان بالا قیزلار گلر ایندی قارداش قوجاقینده ئوله قارداش نه چتیندی بیلمز باشینا گلمین انسان سنه قربان ای یاره سی اندازه دن آرتوق اولان ایوای زهرا ساچینی باشینون اوسته یولان ایوای باشی یاریلوب گوزلرینه قان دولان ایوای گورمز تایووی عالم امکان سنه قربان گوزلور یولووی خیمه قباقینده سوسوزلار یاندیم العطش ناله لری گوگلره قالخار گلمور بورا سس خیمه دن آرتیق آرامیز وار جان اوسته اولاردان نگرانسان سنه قربان هر بیر اوخی که پیکروه دگمیش ابوالفضل سینوندن اول قلبیمه اگلشمش ابوالفضل باخ قامتیمی همچو کمان اگمیش ابوالفضل منده اولارام قانیمه غلطان سنه قربان من غملی شه ائیدیم منه سن غملی علمدار آرام دلیم حال دلوندن خبریم وار سنده یارالی منده فزون دل یارامیز وار دل یاره سی چوخ سختیدور اوخدان سنه قربان ای لشگریمین عرصه ده سر لشگری لایلای دوشدی خطره زینبیمون معجری لایلای لایلای غمی یاددان چیخادان اکبری لایلای یان یانه یاتان جمله شهیدان سنه قربان هیهات چیخا غصه لرون او دلی دلیمدن آلما خبر احوالیمی گور اَیری بئلیمدن یوخدور قالانیم پرچمیوی آلسون الیمدن قالموب حرمه بیرجه نگهبان سنه قربان ایللردی آقا نوکرووم عبد ذلیلم آغلار گوزولن درگهیوه منده دخیلم (( ناصح دور )) آدیم بنده ی خلّاق جلیلم سائل سنه من – سن منه سلطان سنه قربان ****** ناصح اردبیلی برچسبها: ناصح اردبیلی
+ نوشته شده در سه شنبه ۲۶ فروردین ۱۴۰۴ساعت توسط حاج محمد محمد قاسمی
|
|
درباره وبلاگ  بسم الله الرحمن الرحیم
«مَن بَکی أَو أَبکی أَو تَباکی فی مُصیبهِ الحُسین حُرِّمَت جَسَدَهُ علی النار و وَجَبَت لَهُ الجَنَّه .» ؛هرکس در مصیبت امام حسین بگرید یا بگریاند و یا ( اگر گریه اش نیامد ) خود را به حالت گریه بزند ؛ جسدش بر آتش حرام شده و بهشت بر او واجب می گردد التماس دعا حاج محمد محمد قاسمی
|
