احوالات حضرت ابوالفضل (ع)

ای با وفا ابالفضل درده دوا ابالفضل

آچ قانلی گوزلریوی مشگل گشا ابالفضل

امید و پناهیم وزیر سپاهیم

آلدیم سسون امداده گلدیم اوزیم آی قارداش

قارداشسیزین قلبینده اولماز دوزیم آی قارداش

ایوای ابالفضل اولوب دلده سوزیم آی قارداش

بو قانلی گوزلریوه قربان گوزیم آی قارداش

بیرده ئولینجه سنسیز گولمز یوزیم آی قارداش

احوالیوه قان آغلور اهل سما ابالفضل

امید و پناهیم وزیر سپاهیم

آچ قانلی گوزلریوی ای وفالی سرداریم

یامان گونیمدی قارداش ای غم گونی غمخواریم

اوغولسوزام یالقوزام یوخ منیم هواداریم

دور منله باهم گیداخ گوزلور یولون قیزلاریم

قوللاریوه نه گلدی غیرتلی پرچمداریم

قان دوتوب گوزلریوی ای مه لقا ابالفضل

امید و پناهیم وزیر سپاهیم

ایتدی منی بو حالون درد و غمیله دمساز

ایتدون منی دل افکار اولدون عجب سرافراز

بی بال و پر ایدورسن باغ بهشته پرواز

چاتدی پایانه عمرون غم گونیم اولدی آغاز

هیچ کیم بلا گونینده قارداشه قارداش اولماز

قارداشیوی تک قویما باب رجا ابالفضل

امید و پناهیم وزیر سپاهیم

ایویم یخیلار گیدسون بیرکسیم یوخدی قارداش

ئولوب علی اکبریم محنتیم چوخدی قارداش

گوزلور یولووی زینب رقیه م توکور قان یاش

عالم لری آغلادان بیر اوچ پر اوخدی قارداش

گورمه میشم عمریمده بیر بیله یارالی باش

دوشوب بلایه باشون چون مرتضی ابالفضل

امید و پناهیم وزیر سپاهیم

ای گوزلریمین نوری گوزدن حسینی آتما

یارالی نعشون اوسته قارداشیوی آغلاتما

گوزیم اوسته یرون وار قوملارین اوسته یاتما

ای ماه بنی هاشم گون چیخمامیش سن باتما

باش یاروندان قان آخور گوز یاشون قانه قاتما

سو صحبتینی بوشلا چوخ آغلاما ابالفضل

امید و پناهیم وزیر سپاهیم

قولارون پیکرونده اولیدی کاش یارالی

بیر قول بویون اولیدوخ ایکی قارداش یارالی

نیلدون بس باشیوه دگنده داش یارالی

من اورگدن یارالی سن باشا باش یارالی

دشمن باخور دور گیداخ یاواش یاواش یارالی

بو یانار احوالیوه آغلار (( فتا )) ابالفضل

امید و پناهیم وزیر سپاهیم

******

حسین فرهادی مراغه ای ( فتا )


برچسب‌ها: حسین فرهادی مراغه فتا
+ نوشته شده در  سه شنبه ۲۶ فروردین ۱۴۰۴ساعت   توسط حاج محمد محمد قاسمی  |