‍ عشق حضرت امام حسین (ع)

یا حسین گل آدیوا نو گل طاها یاراشور

آتا اولماق سنه حیدر آنا زهرا یاراشور

اولا قاردوشون حسن اوغلون اولا زین العباد

باجی دنیاده سنه زینب کبرا یاراشور

هاجر اسماعیله فخر ایتسه منیم اوغلومدور

علی اکبر آناسی اولماقا لیلا یاراشور

دوغولان گونده آناندان سنه ای فخر بشر

دایه حوریّه اولا قابیله لعیا یاراشور

آناوین عفّتینه مریم اوزی غبطه ایدر

سنی مدح ایلماقا حضرت عیسی یاراشور

طور سیناده تجلّا ایلدون موسایه

او کلیمه اولا سندن بو تجلّا یاراشور

حسنوی خلق ایلین یوسفی حیرتده قویوب

سنه کنعان گوزلی ایتسه تماشا یاراشور

قامت سروین اگر سایه سالا حشر گونی

سایوه دالدالانا شاخۀ طوبا یاراشور

دورد اوغول دوغدی فدا ویردی سنه امّ بنین

دیدی اوغلانلاروما سن کیمی مولا یاراشور

افتخار ایتدی کنیز اولسا آنان فاطمیه

اولا زهرایه کنیز مریم و سارا یاراشور

حشریده بیر بیر عزادارون الیندن دوتاسان

بیر ایله گونده سنه حلّ معمّا یاراشور

آندولا فاطمه نون عفّتینه عصمتینه

بیر سنه بیله شفاعت بیله امضا یاراشور

سنه فرمانده لشکر اولا عبّاس علی

ایکی قولدان گیچه سو اوسته او سقا یاراشور

تشنه لب آب فراتی آلا لب تشنه چیخا

بیر ابوالفضله فقط بیر بیله سودا یاراشور

علی اصغر کی باتوب قانینه سینونده یاتوب

یارالی سینوه مرحم او دل آرا یاشور

(( تابع دینه )) خدادادی ویروب دم نه گوزل

سنون حقونده بیله شعر اولا انشا یاراشور

******

مرحوم محمد حسین تابع دین


برچسب‌ها: محمد حسن تابع دین
+ نوشته شده در  یکشنبه ۲۶ اسفند ۱۴۰۳ساعت   توسط حاج محمد محمد قاسمی  |