‍ احوالات ورود به کوفه

وارد اولوبدی کوفیه غملی قطاری زینبون

صرصر ظلمولن خزان اولدی بهاری زینبون

قوللاری باغلی ناقه ده ایل و تباری زینبون

قلبی یانیقلی داغدار یوخدی قراری زینبون

نیزه لر اوسته سیر ائدور نیزه سواری زینبون

کوفه نه کوفه شهر شوم اهلی جنود دیو و دد

بامیلره چیخوبدیلار خارج از عده و عدد

الده حنا اتکده داش پیشه غلط نیتی بد

پینه لی دی جبینیلر دیلده ده ذکر یا صمد

کیم لریلن وار ای خدا ، گور سرو کاری زینبون

کول سپوری بیر عده سی بعضی لری داش آختارور

شادلیق ائدیر شعفده دی شوقیله شاباش آختارور

زینب زار او حالیده یاریله یولداش آختارور

جسمی حسیندن آیری دی روحینه یولداش آختارور

بیله مناظری گوروب آرتدی فشاری زینبون

مسخ ائلییبدی ملتی ابن زیادین حیله سی

یتدی ظهوره کوفه نین تربیت رذیله سی

سلسله بند اولوب بوگون سلسله جلیله سی

گورموری لیک جز جمیل زینب عرب عقیله سی

درسین اونا وئریبدی چون مام کباری زینبون

سسلوری هر بلا گله راضیدی زینبون سنون

ایلمرم خدا گیله راضیدی زینبون سنون

فدیه لرون قبول ائله راضیدی زینبون سنون

باشینی وورسا محمله راضیدی زینبون سنون

ایستوری اوخشویا اولا عین نگاری زینبون

پتک اولوری قولاقینه خیردا بویوک داشین سسی

سس سسه چاتموری فقط چونکه وار اوباشین سسی

ایلدی آرزو گله بیرجه ده قارداشین سسی

حاجتی تیز اولوب روا گلدی کسیک باشین سسی

دوشدی گینه تلاطمه قلب فکاری زینبون

سسلدی گل اخا که وار بوردا ساواش ضیافتی

عترتیوه دوتوبدولار دیده ده یاش ضیافتی

سفره لره سپولّه کول دوتدولا داش ضیافتی

گورمه میشیدیم هیچ حسین عمریده باش ضیافتی

نیزه لر اوسته داشلانور دار و نداری زینبون

دایره ی خیالیدن خارج اولوب ملالیمیز

فوج بلادیوخ حسین جاری دی اشک آلیمیز

زخم زبان وورور بیزه دشمن بد سگالیمیز

هم داغیلیب توفاقیمیز هم پوزولوب جلالیمیز

نان و رطب ویرور بیزه دشمن خاری زینبون

خولی گوروم ذلیل اولا قویموش عذاریوی کوله

دامن وصلیوی حسین بیرده اگر سالام اله

نیزه چی باشیوی وئره عمریمی ایلرم صله

ایلمرم زمانه دن وار نه قدر جانیم گله

جان وئررم گله اله ، وصل دوباری زینبون

غصه بی شماریمین یوخ چاتان حد و حصرینه

جبریله زینبون گیدور ابن زیاد قصرینه

رنگ فنا گرک چکم آل امیه عصرینه

ایله دعا بو باجیوین کاخیده فتح و نصرینه

سیندیراجاقدی نطقیلن حصر و حصاری زینبون

******

رحیم شایان ارومیه


برچسب‌ها: رحیم شایان
+ نوشته شده در  یکشنبه ۲۶ اسفند ۱۴۰۳ساعت   توسط حاج محمد محمد قاسمی  |