‍ نوحه اول ماه محرم گریز به عاشورا و قتلگاه

(سبک: احوالیمیز یاماندی )

یا فاطمه حسینون باشلاندی بزم یاسی

آغلاتدی عرش وفرشی ایوای حسین صداسی

آیلار دولاندی گلدی ماه محرم اولدی

عرشه چکیلدی قاره اعلام ماتم اولدی

کیم عاشق حسیندی ماتمله همدم اولدی

اگنونده کی لباسی اولدی حسین قراسی

بو آیدا ای عزیزان سیزلرده همت اولسون

تبلیغ ائدون حسینی هر یئرده صحبت اولسون

قاره علملر آتدا بیر آیری قدرت اولسون

سرمشق اولا گرکدی منشور کربلاسی

جاندان حسین گئچوبدی دین اوسته وحدت اوسته

نه اینکه کسب جاه و یا اینکه قدرت اوسته

بلکه عقیده اوسته قرآن و عترت اوسته

عالملره یایلدی مقتلده کی نداسی

غم چهره سی دوتوبدور بو آیدا عرش طاقی

تشکیل اولوب حسینه مقتلده عشق اطاقی

یاندی سووین یانندا زهرا ئوپن دوداقی

دیلدن سالوب حسینی اوچ پراوخون یاراسی

لرزه دوشوب جهانه مانند گاهواره

بیر ضربه گوردی سینه دوشدی یارا فشاره

زهرانون اوندا ناگه قلبی دوتوب شراره

آغلاتدی ممکناتی شام اهلینون جفاسی

مخیمده گوردی زینب وضع زمانی بحران

یعنی نظام عالم ایستور اولا پریشان

بیر غرّش ایتدی زینب مانند شیر یزدان

معناده سسلنوبدی احسن اونا آناسی

بیر ناله نین صداسی گلدی یئره هوادن

بیر ناله ده اوجالدی یئردن گویه منادن

زینب سسی اوجالدی میدان کربلادن

وای قارداشیم دیَنده آچدی گوزون رجاسی

شمری گوروبدی ناگه الده قلنجی عریان

ایستور سالا او ظالم دنیایه گوردی طوفان

بیر سینیه چیخوبدور هر سمتیدن آتور قان

باش کسمگه بیلوبدی یوخدی اونون اِباسی

ال آتدی خنجریندن دوتدی به فوری زینب

اهل اشاره اولسا بسدور اونا بو مطلب

بارماقلاری کسیلدی قالدی نه حاله یارب

بیلدیردی عالمینه عشقون ندور بهاسی

سسلندی کسمه ظالم قارداشیمون بوغازین

سجده ائدوردی حقه قطع ایلدون نمازین

قوی بیر آلوم قوجاقه درک ایلیوم نیازین

گرچه سنی دوتوبدی ری ملکینون هواسی

وئرمه تکان الینده شمشیره بی مروّت

اَن سینه دن اشاقه وئرمه حسینه زحمت

کسمه سوسوز بوغازین سالما جهانه وحشت

وابسته دور حسینه بو عالمون بقاسی

******

حاج محمدباقرعباسی(سائل زنجانی)


برچسب‌ها: محمدباقرعباسی سائل زنجانی
+ نوشته شده در  یکشنبه ۲۶ اسفند ۱۴۰۳ساعت   توسط حاج محمد محمد قاسمی  |