|
تقدیم به بارگاه نوکران باصفای حضرت اباعبدالله الحسین (ع) یارالدان چرخ خضرانی عطادن ال چکر ؟ چکمز زمرّد رنگْ سجّاده صَلادن ال چکر چکمز چمنده بلبل ِ دستان نوادن ال چکر چکمز ئورک شور ِ بَلاءُ لِلوِلادن ال چکر چکمز ولانی آختاران قانلی منادن ال چکر چکمز بلا مخموری جام ابتلادن ال چکر چکمز ئولونجه آرزوی کربلادن ال چکر چکمز حسینون عشقی بیر اوتدی گرفتار اولمیان بولمز باشیندا شوق دیدار رخ یار اولمیان بولمز بو بیر قیمتلی کالادی خریدار اولمیان بولمز آدی درمان دی هر بیر درده بیمار اولمیان بولمز عزاسی بزم عزت دی عزادار اولمیان بولمز مزاری کعبه دن اشرف دی زوار اولمیان بولمز صفا حاجی سی، شش گوشه منادن ال چکر چکمز حسینچی آتش عشقین ئورکده جابجا ساخلار بو عشقین شعله سین تاعرصه محشر به پا ساخلار ئولونجه باشی دالدان ذبح اولان شاهه عزا ساخلار حسینه آغلاماق واللهی آللهی رضا ساخلار بوگوز یاشلار حسین عاشقلرین اوتدان جدا ساخلار بوگوز یاش شیعه نین باشین قیامتده اوجا ساخلار بصیرتلی صفالی گوز بُکادن ال چکر چکمز عقیده شیعه نین دی نه پیمبر نه امام ئولمز بیزیم مکتبده نه شاه و نه نوکر نه غلام ئولمز حسینچی جان وئرر اما نه نهضت نه قیام ئولمز حسین چی ئولسه ده جام ولادن تشنه کام ئولمز حسینچی ئولسه ده اوندان قالان عشق ومرام ئولمز حسینون بی ریا نوکرلری بی احترام ئولمز ئولنده ، شاه دین بیله گدادن ال چکر چکمز حسین آدی گلن مجلسده ذکر انَّ یَهدی وار مقدّس یردی اوردا قدسیانین جدّ و جهدی وار معطّر ایلین کامی صفا و عشق شهدی وار او بزمه باش چکر مولاسی ازّل گوندن عهدی وار مسیر انسجامه ختم اولان هر هانسی رَهدی، وار وئرون یئر بانی مجلس حسینون اوغلی مهدی وار حسینچی بیله بزم باصفادن ال چکر چکمز حسین دیوانه سی بحر وفاده رتبه سین سانماز دوشر مین بیر بلایه ئوز مرام و مکتبین دانماز یانار عشق حسینه آیری بیر آتشده اودلانماز بو بیر سوزدی اگرچه مدعی لر قانمیوب قانماز حسین عاشقلرینه آتش دوزخ الولانماز جهنم آتشینده زائر کرب و بلا یانماز مگر جنت بئله صدق و صفادن ال چکر چکمز قمار عشقیده والله اوتوزماز بی ریا نوکر مگر اولاد و مال و جانه ایلر اعتنا نوکر آچار پر طایر روحی ائدر جانین فدا نوکر محبت دردینه دوشجاقی آختارماز دوا نوکر اونا بسدور کی بیر دفعه دئسون شه، مرحبا نوکر بولرکی اوندا اولدی باشی باشلاردان اوجا نوکر مگر نوکر بئله اجر و جزادن ال چکر چکمز گلستان ولایت ده آچان گول خاره باش اگمز حسینچی جان و مالیندن گئچر اشراره باش اگمز حسینچی باش وئرر یاره ولی اغیاره باش اگمز حسینچی پول زور و خلعت زر تاره باش اگمز حسینچی شهرت و آد آختاران زواره باش اگمز عزاداره گولوب توهین ائدن کفتاره باش اگمز بولَرکن مدّعی بیرآن جفادن ال چکر چکمز حسینچی قالسا بُرج آلتیندا دا ادنایه یالوارماز بش اون درهم پولا خاطر گئدوب سُفلایه یالوارماز باشی توش اولسا شمشیره گینه اعدایه یالوارماز کی اقیانوس شخصیت گلوب دریایه یالوارماز سپهر استقامت آفتابی آیه یالوارماز اونی ئولدورسه لرده دشمن زهرایه یالوارماز حسینچی مَسلک خیرالنسادن ال چکر چکمز (محمدعلی مصیبی تبریزی) برچسبها: محمدعلی مصیبی تبریزی
+ نوشته شده در یکشنبه ۲۶ اسفند ۱۴۰۳ساعت توسط حاج محمد محمد قاسمی
|
|
درباره وبلاگ  بسم الله الرحمن الرحیم
«مَن بَکی أَو أَبکی أَو تَباکی فی مُصیبهِ الحُسین حُرِّمَت جَسَدَهُ علی النار و وَجَبَت لَهُ الجَنَّه .» ؛هرکس در مصیبت امام حسین بگرید یا بگریاند و یا ( اگر گریه اش نیامد ) خود را به حالت گریه بزند ؛ جسدش بر آتش حرام شده و بهشت بر او واجب می گردد التماس دعا حاج محمد محمد قاسمی
|
