مدح حضرت ابوالفضل (ع)

انسانلارا آئینۀ ایمان ابوالفضل

سرمایۀ ارزندۀ قرآن ابوالفضل

همّت داغیندا استقامت آبشاری

انسانلارا انسانلیقین آموزگاری

تاریخ اسلامین مدال افتخاری

اسلامیانه گنج بی پایان ابوالفضل

افلاک آل هاشمین تابنده ماهی

اولدوزلارین گون آردیجا پشت و پناهی

مظلوم دشت کربلانین سر سپاهی

سر لشکر سلطان انس و جان ابوالفضل

دریا کیمی طوفانیده داغ داشه داشمیش

مشکینده کی سو قرمزی قانه بولاشمیش

قانیله گوز یاشی گوزوندن یوللار آشمیش

آماج تیغ و نیزه و پیکان ابوالفضل

تقوا یولون هموار ایدن اهل یقینه

مین آفرین تحصیل ایدن اُمّ البنینه

قربان اولان تحکیم و استقلال دینه

ترویج اسلامه اولان قربان ابوالفضل

دیباچۀ آزادی و منشور عزّت

غوّاص اقیانوس عشق و آدمیّت

گوش جهانه نعرۀ تکبیر غیرت

اولمز اولونمز زندۀ دوران ابوالفضل

عنقای پر بشکستۀ قاف صداقت

سیمرغ اوج جانفشانی و رشادت

ناموس قاموس گرانقدر شجاعت

شیر ژیان تک جنگیده غرّان ابوالفضل

تاریخ ظلمون قانیله رنگین قارالدان

باغ حیاتین قان توکن اوخلار سارالدان

شیر خدانین جنگینین مثلین یارالدان

پروردۀ شیر حق منّان ابوالفضل

وجدان انساندا ندای کبریائی

جسمینده وار میش روح پاک مرتضائی

حق آستینیندن چیخان دست خدائی

گرز گران و پنجۀ قرآن ابوالفضل

سُولقونلیَن جسمی چکن اود تک زبانه

عطشان ئولن یوز دوتمیین آب روانه

باش پارچلانمیش یوز بویانمیش تازه قانه

قان قان دیَن اوخلاریله شان شان ابوالفضل

راه بلاده مین بلا گنجینه سینده

حق انجلاسی قلبینون آئینه سینده

دین پرچمین حفظ ایلیین اوز سینه سینده

پرچم به دوش شاه مظلومان ابوالفضل

قانی آخوب گل تک صولوب رنگی قاچیلمیش

باغ وجودینده قزیل گوللر آچیلمیش

آنّیندا بیر اوچ شعبه لی پیکان ساچیلمیش

یورقون یارلی تشنه لب عطشان ابوالفضل

جهد و جهادین درسینین باش او ستادی

جهدیله هر مرد مجاهد اجتهادی

دوتموش او دامندن گینه اشکیله (( هادی ))

لطف ایله ای زیبندۀ احسان ابوالفضل

******

مرحوم هادی سلطان محمدی تبریزی


برچسب‌ها: هادی سلطان محمدی
+ نوشته شده در  پنجشنبه ۲۳ اسفند ۱۴۰۳ساعت   توسط حاج محمد محمد قاسمی  |