احوالات امام موسی بن جعفر (ع)

مدتدی منیم یانیمه بیر کیمسه گلن یوخ

احوالیمی بو غربت آرا یاده سالان یوخ

یا رب من اوزوم گوشة زندانیده پیرم

هارون جفا کاره نه مدتدی اسیرم

****

زندان اولا سوز یوخ یاتارام حبسده راحت

بیر گوشه ده اوللام گینه مشغول عبادت

اما واریدی قلبیده بولمم نه عداوت

هر نه دیرم ایلمز اصلاً اونا تأثیر

یوخسا من بیچاریه نه کونده و زنجیر

زنجیریله بوینوم گوروسن بسته دی یا رب

سنگین ایلیوبدور بدنیم خسته دی یا رب

بیر کمسه دیمز لر که بو نه اوسته دی یا رب

یورقون بدنیله دوزرم بس ندی چاره

طاقت گتورر کیم بو قدر رنج و فشاره

قورتار منی یا رب بو زمانین ستمیندن

قرآنی دانان اهل جفانین ستمیندن

هارون جفا کار و دغانین ستمیندن

قورتار منی ای بنده نوازیم سنه قربان

اوز محضریوه قوی اولوم عازم سنه قربان

چوخداندی منیم حالیمی بیر کس خبر آلماز

احوالیمی بو غربت آرا یادینه سالماز

هئچ گلشن و گل من کیمی دنیاده سارالماز

بیر خاره دچار اولموشام الله علاجیم یوخ

زندانیده جان ویرسم او نیسگیلدی باجیم یوخ

بیر ظلم ایلیوبدور منه بو ظالم بیداد

عمرونجه توکر گوز یاشی معصومة ناشاد

گوندر اجلون پیکینی ایتسون منی آزاد

ایللردی منیم باغریم اولوب قان بو قفسده

چوخ ناله ایدوب بلبل خوشخوان بو قفسده

بلبل که نوا خواندی اونون شغلی نوا دور

عاتدی قفس چون اونا بیر باغ صفا دور

اما که منیم دردیمه بیر مرگ دوا دور

پیشواز ایدرم مرگی بو قلبیمده رضا دی

قلبیم سیخیلور گلدی رضا اوغلومون آدی

بو اهل جفا قویمادیلار ظلمیده نقصان

قرآن اوخویانلار هامیسی هی دی قان قان

عالم بوئی خشک اولمیاجاق شمر توکن قان

الله قانیدور حشره علامت قالاجاقدور

قان صاحبی وار گلسه قیامت سالاجاقدور

قربان اولا جانیم سنه ای سرور والا

نوکردور (( امینی )) سنه ائیللر بوئی مولا

گلماخلیقا قبرون باشینا قویموری اعدا

لطف ائیله صفا ور بو گلستانه اوزون گل

ای حامی قرآن بیزیم ایرانه اوزون گل

******

حاج رسول امینیان (امینی خوئی )


برچسب‌ها: رسول امینیان امینی خوئی
+ نوشته شده در  چهارشنبه ۲۲ اسفند ۱۴۰۳ساعت   توسط حاج محمد محمد قاسمی  |