|
جوشی _ ورود به کربلا (سبک : علی جان بالا لبیک ...) بلا دشتینه زینب ، بلا عشقینه گلدیم کِچوب مرز فنانی ، بقا عشقینه گلدیم **** بو یئر مخزن درد و مصیبات و بلادور بو یئر مدفن پاکِ شهیدان خدادور او گودال شهادت کی میداندا بنادور گروه عرفاته او یئر قبله نمادور منه مسجد عشق و تحیات و ثنادور بو تربت کی گورورسن هامی درده دوادور ایدیب دردی تحمّل دوا عشقینه گلدیم دیمزلر اونا عاشق هر عاشقده سر اولسا ویرر سر اولا سردار وفاسی اگر اولسا ویرر دار و ندارین ولو صود امر اولسا بنات و حرمینی اگر دیده تر اولسا بیابانه عیالی دوشوب دربدر اولسا دوزر چهره گشاده بلا هر قدر اولسا بو عهدی ایلیم من ادا عشقینه گلدیم خیال ایلمه گلدیم بورا اکبره خاطر نه قاسم نه ابوالفضل و نه جعفره خاطر نه باجی نه صبایا و نه همسره خاطر گمان ایلمه گلدیم بالام اصغره خاطر نه دنیا نه تعلق نه سیم و زره خاطر بو گودالیده باشیسز دوشن پیکره خاطر فقط درک ایله زینب خدا عشقینه گلدیم گلوب شوقه وجودیم خدادن نظر ایستر منیم نخل مرامیم اولا بارور ایستر قیزیب خرمن عشقیم فقط بیر شرر ایستر گمان ایلمه گوگلوم نوید ظفر ایستر بیلورسن باجی گوگلوم بو یئرده نلر ایستر لب عطشان دگه بیر اوخ سینمدن سه پر ایستر چوخور مقتلین ایچره ثنا عشقینه گلدیم منیم سینمه بوردا کتاب آغلاسا خوشدور سنون زلفوه زینب حجاب آغلاسا خوشدور دیوب اصغره لایلای رباب آغلاسا خوشدور سوسوز گُوللره خاطر گلاب آغلاسا خوشدور بوآغ خدّیمه قاندان خضاب آغلاسا خوشدور ابوالفضلیمه پرسیز عقاب آغلاسا خوشدور اسن سینه سی اوسته لوا عشقینه گلدیم بو یئرده باجی بیر کس بیزه دادگر اولماز قضا اولسا موافق ولیکن قدر اولماز بیزیم دشمنیمیز تک شقاوت اثر اولماز بودور رسم ستیزه همیشه ظفر اولماز ولیکن اوخا هرگز هدف صودامر اولماز اگر وورسادا صیاد او پیکان سه پر اولماز دوتام اصغره بوردا عزا عشقینه گلدیم گرک جانیمی قربان ویرم دین خدایه گرک هر نه واریمدی چکم نار فنایه چاتام ساحل امنِ بهادارِ بقایه ویرم کعبه دن آرتوق جلا کرب و بلایه باشیم ذبح اولا دالدان چیخا نوک جدایه ال اوزدوم هوسیمدن گلنده بو منایه قویوب منبری حسرت جدا عشقینه گلدیم غریب الغربایم بو غربت وطنیمدور بو یئر مشرق شمس سر بی بدنیمدور اول آگه باجی زینب قیزیل قان کفنیمدور باشوندان یولونان ساچ سینمده چمنیمدور آچیلمیش گُوله بنذر یارام یاسمنیمدور اولان دشمنه غارت منیم پیرهنیمدور چکم اوستونه قاندان قبا عشقینه گلدیم ****** حاج حسین غفاری اردبیلی برچسبها: حسین غفاری اردبیلی
+ نوشته شده در دوشنبه ۲۰ اسفند ۱۴۰۳ساعت توسط حاج محمد محمد قاسمی
|
|
درباره وبلاگ  بسم الله الرحمن الرحیم
«مَن بَکی أَو أَبکی أَو تَباکی فی مُصیبهِ الحُسین حُرِّمَت جَسَدَهُ علی النار و وَجَبَت لَهُ الجَنَّه .» ؛هرکس در مصیبت امام حسین بگرید یا بگریاند و یا ( اگر گریه اش نیامد ) خود را به حالت گریه بزند ؛ جسدش بر آتش حرام شده و بهشت بر او واجب می گردد التماس دعا حاج محمد محمد قاسمی
|
