|
حالات وداع رهبر آزادمردان حضرت سیدالشهدا (ع) اسیر ابتلا باجی ، انیس البلا باجی اگر بلانی ایسته سون بو سن بو کربلا باجی وداع آخرین دور زمان تنگ انقلاب صدای الفراقدن خیامی دوتدی اضطراب دایاندی پیش خیمه ده رئیس آل بو تراب چاغوردی غم شرکینی ایدوب بو نوعیله خطاب حسین گیدور شهید اولا غم ایتمه مبتلا باجی اگر بلانی ایسته سون بو سن بو کربلا باجی یادوندا دور الستیده قبول دور بلا دیدوک مشیّت اللهیه خلوصله بلی دیدوک شهادت و اسارته شریک اولوب رضا دیدوک قدر امین دور بیزه وکیل دور قضا دیدوک گواه عهدنامه مز رئیس انبیا ، باجی اگر بلانی ایسته سون بو سن بو کربلا باجی ازلده هم مرام اولوب بیر اولدی ایده آلمز اوجالدی خیر عشقدن مراتب و جلالمز کماله یتدی حمد اولا صفاتمز خصالمز مساوی چخدی عشقمز جوابمز سؤالمز سن عشقوون اسیری سن من عشقه جانفدا باجی اگر بلانی ایسته سون بو سن بو کربلا باجی فضای صبح صبرده صفای خوش پدیده سن فروغ چشم مرتضی بتوله پروریده سن اصالتاً کریمه سن نجابتاً حمیده سن آنام کیمی سوزون متین آنام کیمی رشیده سن وجودون آل هاشمه عطیّه ی خدا ، باجی اگر بلانی ایسته سون بو سن بو کربلا باجی طلوع شمس دیندن کچوبدی شصت و چار سال اضافه نیم قرن دن اولوب تلاش بی مثال سنوبدی جدیمون دیشی اُحده ای وفا خصال قلجلانوبدی سجده ده آتام او مفخر الرّجال سبوی زهری باشنه چکوبدی مجتبا ، باجی اگر بلانی ایسته سون بو سن بو کربلا باجی بنی امیّه شامده تاپوبدی زور و اقتدار یتوبدی اوج قدرته یزید پست و می گسار آلوبدی دوره سین اونون ظلام شوم جیره خوار شریعت پیمبره ئورکده سوء قصدی وار قیامدن صورا منه نه چاره با وفا باجی اگر بلانی ایسته سون بو سن بو کربلا باجی خمود ملّت ای عجب گیدوبدی خواب غفلته زمام دین و مسلکین ویروب شریر امّته لباس فخر زندگی یاراشمادی بو ملّته بلنمز اوج عزتی کیم عادت ایتسه ذلته بو زندگی سزا دگل حسینه مطلقا باجی اگر بلانی ایسته سون بو سن بو کربلا باجی سیاهه ی فساد اولوب یزید کارنامه سی بلای جان دین دور فساد دین ادامه سی دلیل زهد دور مگر کیمون اولا عمامه سی صلاتی ئولدورر اونون صلاتنون اقامه سی گرک امین شرع اولا ، کیم اولسا پیشوا باجی اگر بلانی ایسته سون بو سن بو کربلا باجی او کسکه زور و جبریله حکومت ایتسه ملته تصرف ایتسع دین ده خیانت ایتسه امته گرک هامی کفن گیوب معین اولا شریعته شریک جرمدور بلی چکلسه هر کیم عزلته الین قویوب ال اوستونه اوتورسا بی صدا باجی اگر بلانی ایسته سون بو سن بو کربلا باجی زبون اولور جبون اولان قیامه جرأت ایلمز هراس ترک خوندن جهاده همت ایلمز بلند پایه شخصلر قبول ذلت ایلمز بلند پایه دور حسین پلیده بیعت ایلمز سوزون دیر باشین ویرور ، یزیده سوز بها باجی اگر بلانی ایسته سون بو سن بو کربلا باجی او آدمک نمادی من دلیل آدمیتم او سر بسر خطادی من کرم نمای خلقتم او سر خوش جفادی من امین و با عدالتم او فرد بی حیادی من شریف آل عصمتم او دشمن خدادی من خدایه آشنا باجی اگر بلانی ایسته سون بو سن بو کربلا باجی لباس ننگ ظلمدن او ظالم ایتمور اجتناب سریر دین ده ایدور فساد خانمان خراب اسیر غول نفسدور خمار تشنه ی شراب فواسی سکه ی طلا سلاحی قهر دور عتاب حسین قالوب کیم اولدی گوز امین و مقتدا باجی اگر بلانی ایسته سون بو سن بو کربلا باجی بو گونکه گون طلوع ایدوب آچیلدی فجر جانفزا صفای عاشقاندن افقده صبح آلوب صفا دوشندی خوان مغفرت بذندی دشت نینوا منای عشقی گورمگه گلوبدی فوج انبیا بساطمی گورن دیدی حسینه مرحبا باجی اگر بلانی ایسته سون بو سن بو کربلا باجی یوباتمادوم فدالری سوز اولماسون نگاریله بیوک کچک کفن گیوب متانت و وقاریله یتشدیلر شهادته کمال افتخاریله قالوبدی بوش چادرلاری انیس اولوب غباریله نمالری اولوب منه نمای غم فزا باجی اگر بلانی ایسته سون بو سن بو کربلا باجی دگلدی آشنا او که رموز و طرز صحبته آتووب قدم گیدنمدی ، بشیکده گلدی رقته قوجاقنه آلوب حسین آپاردی کوی وحدته مؤثر اولدی محنتی عوامل طبیعته او گلدی تیز پر اوخا من ایلدیم نوا باجی اگر بلانی ایسته سون بو سن بو کربلا باجی خموش ایدبدی حرمله جفاسی اوغلوم اصغری بویاندی قانه لبلری یومولدی قاره گوزلری کریم و ذوالجلال اوزی او طفله اولدی مشتری پر آچدی روحی جنته المده قالدی پیکری حسینه تسلیت دیدی خدای ماسوا باجی اگر بلانی ایسته سون بو سن بو کربلا باجی مقدراته یوخدی سوز گرک بوگون اولان اولا ردیف ایله نظامیله مخدراتی ساق صولا آنامکه یوخ نیابتاً قولوی بوینما دولا حسینی سال جلالیله نگاری استین یولا ذبح عشق مقدمین گوزتلیور منا ، باجی اگر بلانی ایسته سون بو سن بو کربلا باجی مسافرون دالیجا سو سپلر ای وفا شعار بو شرطیله قیتمگه گیدن اولا امیدوار قیتمین مسافرون سویا نه احتیاجی وار سوسوز بوغازیمی منیم گل اوپ همیشه اول خمار موفقیّته سنی اوزوم ایدوم دعا باجی اگر بلانی ایسته سون بو سن بو کربلا باجی آدون اولوبدی سر سخن مصیبتون کتابنه نه غصه لیل رنجدن فضیلت آفتابنه مواظب اول حرملرون حجابنه نقابنه حسین چوخ ایستین قیزی قوجاقه آل صوابنه یخلسا ناخوش اوغلوما بفوری ویر عصا باجی اگر بلانی ایسته سون بو سن بو کربلا باجی یورولما هر قدر سنی فشاره سالسا کوفیان قناعت ایله چوللره فنایه گتسه خانمان اطاعتونده ثابت اول عبادتونده جان فشان گیجه نمازینه گیجه اراده ایلین زمان حسینی یاده سال ایله نمازوی ادا باجی اگر بلانی ایسته سون بو سن بو کربلا باجی باش اگمه دشمنه بلا نقدری گلسه باشوه دوام ایله جگر قانی قارشسا گوزده یاشوه بو نهضتون تکاملی قالوب سنون تلاشوه سلاح تیز نطقوه کلام درّ پاشوه توکّلونده محکم اول روشده با صفا باجی اگر بلانی ایسته سون بو سن بو کربلا باجی گورنده جنب جوشده شیوخ بولهوسلری سکوته اُسکتو دیوب مبدل ایله سسلری درون سینه لرده سال شماریه نفسلری یرینده قویما ترپنه رونده نی جرسلری دیسونله صدر منبره چخوبدی مرتضی ، باجی اگر بلانی ایسته سون بو سن بو کربلا باجی ایله دانش مبرهن ایت حسینون انقلابنی مورّخان عالمون مزّین ایت کتابنی زیادون اوغلونون ایله زیاده اضطرابنی مجاب ایله ویرمسون سؤالون جوابنی مجال ویرمه صحبته دانشسا ناسزا ، باجی اگر بلانی ایسته سون بو سن بو کربلا باجی یوباتما چوخ مسافرم چکوّله بانک الرحیل اوزنگدن دوتانلاریم اولوبدی تشنه لب قتیل رکاب ذوالجناحمی دوتار بو چولده جبرئیل بابامدا منتظر دوروب الینده آب سلسبیل فراته باخسا ایلمز حسینون اعتنا باجی اگر بلانی ایسته سون بو سن بو کربلا باجی ستوده بندگانلر تلاش ایدر ستایشه سجود حقدن یتر مراتبی فزایشه الیم کسلممش گرک اوجالدام ال نیایشه ملک لر آرزو چکه بو عشقی بیر نمایشه ایدنده سجده قان ویره باشمداکی یارا باجی اگر بلانی ایسته سون بو سن بو کربلا باجی کلیمدور حسین مگر دینده ارنی لن گله نه یوسفم خریدیمه بو چولده پیر زن گله سؤالمه گرک منیم جواب پر ثمن گله ندای عاشقانمه عطای ذوالمنن گله بساط عشقدن گوره کلیم لر عطا باجی اگر بلانی ایسته سون بو سن بو کربلا باجی عجالتاً غبار غم دولان حرمسرا سنون شکسته دل حرم سنون ، محیط غم فزا سنون فراق جاودان - نون جگر قانی غذا سنون ایکی گوزل بالون منیم ایکی لچک قرا سنون ایکی اوغولدان ال چکن سالار ایکی قرا باجی اگر بلانی ایسته سون بو سن بو کربلا باجی منای حقده باش ویرن وفالی فدیگان منیم کنار نهریده یاتان وزیر مهربان منیم عباده خیمیه گلن یارالی نوجوان منیم او نوجوان که طوی گونی حناسی اولدی قان منیم سو اوسته اوخلانان بالا منمدی هاکذا باجی اگر بلانی ایسته سون بو سن بو کربلا باجی زمان عصر تنگده خیام شعله زا سنون غروبده حفاظت بنات مصطفی سنون گیجه یاری یانان چادر گر ایلسون بنا ، سنون قرانلوق ایوده بیر بلوک قرا گین آنا سنون یاتورد اوشاقلاری اول تاپانمسون غذا باجی اگر بلانی ایسته سون بو سن بو کربلا باجی بهار عمریده یانوب صولان بهاره لر سنون لباس سرخ لر منیم نقابی قاره لر سنون آخان ستاره لر منیم قالان ستاره لر سنون بوغازی یاره لر منیم دوداقی یاره لر سنون ال اوز حسیندنده سن عزیز هل اتی باجی اگر بلانی ایسته سون بو سن بو کربلا باجی ربابون حال زارینه دخالت ایلمک سنون سکینه اضطرابنه نظارت ایلمک سنون رقیّم آغلیان زمان حمایت ایلمک سنون گلین قیزون قولاقنه طبابت ایلمک سنون قابار ایاقلارا اوزون درست ایله دوا باجی اگر بلانی ایسته سون بو سن بو کربلا باجی سپاهوون یاتان یری اولاندا خالی از خلل دوزنمسون فراقمه خیمده ای نکو عمل سیزیلتدان ملشمدن مجالون اولسا ما حصل مطافمون طوافنه آنام گلنده سنده گل عزیز ئولنده رسمدور عزا دوتار آنا باجی اگر بلانی ایسته سون بو سن بو کربلا باجی ****** مرحوم انور اردبیلی
برچسبها: انور اردبیلی
+ نوشته شده در یکشنبه ۱۹ اسفند ۱۴۰۳ساعت توسط حاج محمد محمد قاسمی
|
|
درباره وبلاگ  بسم الله الرحمن الرحیم
«مَن بَکی أَو أَبکی أَو تَباکی فی مُصیبهِ الحُسین حُرِّمَت جَسَدَهُ علی النار و وَجَبَت لَهُ الجَنَّه .» ؛هرکس در مصیبت امام حسین بگرید یا بگریاند و یا ( اگر گریه اش نیامد ) خود را به حالت گریه بزند ؛ جسدش بر آتش حرام شده و بهشت بر او واجب می گردد التماس دعا حاج محمد محمد قاسمی
|
