احتضار حضرت زینب(س)

گل حسین درد و غمون پیر ایلین زینبوم

غصه لر یرده زمین گیر ایلین زینبوم

اوجالوب موج غمیم آز قالی باشیمدن آشا

چالمشام قمچی گوگردن قنادی داغه داشا

اولان اولدی ئولورم غملی گونوم چاتدی باشا

روزگار اوچوسی نخجیر ایلین زینبوم

سینه خاکستری ایچره هله سوزاندی کُوزوم

یاندیرور سینمی کُوزدنده بتر اوتلی سوزوم

تشنه حلقونده گورن لحظه ده شمشیری گوزوم

ئوز یالین پنجه می شمشیر ایلین زینبوم

شمری گوردوم ایلیور نیّت شومه عجله

منی وادار ایلدی حیدری غیرت جدله

ال آتوب خنجرین عریان طرفین آلدیم اله

شمری هم خنجری تحقیر ایلین زینبوم

سیندی هم هیبت خنجر هم او ملعون و دغا

عاقبت گوردی بیر ایش اللریمه تیغ جفا

منه امر ایتدون او شمشیری باجی ایله رها

قانیمی قانوه تخمیر ایلین زینبوم

اولمادی بیر نفر اول صحنه ده چاتسون دادیما

شمریده بیلمیشدی یوخدی گلن امدادیما

او جری اولدی من عباسیمی سالدیم یادیما

واژه ی غیرتی تفسیر ایلین زینبوم

صولتیم سالدی ایله ولوله شمرین جانینا

قورخودان دوشدی او ناپاک الی بیردن یانینا

گوردوم اما بویانوبلار یالین اللر قانینا

ال قانین سینوه تقطیر ایلین زینبوم

دفتر عمریمی بیربیر گیدورم گونده دالا

دل گوزیلن باخورام بعضی گونه بعضی حالا

گورورم حقلیدی زینب گونی گوندن قوجالا

ناله سی داغ داشا تاثیر ایلین زینبوم

ایندی قارداش نه توانیم قالوب اما نه رمق

قالمیوبدور بو اسن دلده او گفتار سَبق

زندگی دفتری قورتاردی قالوب بیرجه ورق

غصّه لر قدّین اگوب پیر ایلین زینبوم

بستر مرگه سالوب محنت دوران باجوی

اینجیدور سینه ده قوش تک چالیشان جان باجوی

گلسون الان باشیم اوسته تانمازسان باجوی

بیر زمان شمره ئوزون شیر ایلین زینبوم

منتظر گوزلریلن آختارورام صاق و صولی

باخورام کرب و بلایه ساری گوز جامی دولی

مقتلین صحنه سی آغلار گوزومه ظاهر اولی

اشکی سولمش یوزه تکثیر ایلین زینبوم

جابجا ایلیه بلمم داخی قارداش اوزومی

باجی قارداشلقا خاطر یره سالما سوزومی

جان چیخور گل باجووام باغلا بو یورقون گوزومی

اللی ایل غم هدف تیر ایلین زینبوم

******

هادی اردبیلی


برچسب‌ها: غلامرضا هادی اردبیلی
+ نوشته شده در  یکشنبه ۱۹ اسفند ۱۴۰۳ساعت   توسط حاج محمد محمد قاسمی  |