زبانحال طفلان حضرت مسلم ابن عقیل(ع)

رحم ایله بیزه یتیموخ آچما اَل جفایه حارث

وار گناه میز باغیشلا شاه کربلایه حارث

میزبان سن قوناقوخ بس گتورمه آه و زاره

احترام ایله ایوینده سالما دمبدم فشاره

حشرده جزا مسلّم واردی اولما بخت قاره

ویرما سیلی اولما ظالم دوشمشوخ بلایه حارث

بس نه علّته ویرورسان سیلی بی دفاع ئوزومدن

آند اولا امام عصره پارلور اوت دولان گوزوندن

غربت ایوده آشنا یوخ سالما بی کسوخ دوزومدن

قارداشیم منه باخاندا دوندی کهربایه حارث

ختم الانبیا دئیوبدور حرمت ایلیون قوناقدان

گزمیشوخ چولی پیاده دوشموشوخ گیجه ایاقدان

ویرمسن امان ویرما گلمشوخ بورا اوزاقدان

باخگلان قابار ایاقدان بس آخان دمایه حارث

یوخ پناه میز گتوردی سالدی بس قضا کمنده

ویرما خستیوخ امان ویر قالمیوب توان بدنده

مست سن فنا جهاندا ویرماقون ایله بسنده

حشرده ندور جوابون خلق ایدن خدایه حارث

سنده بو قصاص قالماز آند اولا آنام بتوله

واژگون اولوبدور بختون یتمه سن اینان وصوله

نفسوی ملامت ایله مست اولما گل عُقوله

دوزدی قاچ مشوخ خطردن ایلمه کنایه حارث

بی مروت اولما رحم ایت سالما اوت جهانه ویرما

اشک چشم میز عذاره قورخودان روانه ویرما

شل اولا الون دمادم ایلیوب بهانه ویرما

ساخلا ال بو ویرماقوندن گلمه اشتهایه حارث

قُل کیمی بیزی آپار سات ویرمه فرصتی فنایه

سالماروخ که خلق ایچینده قول و فعلی سر صدایه

خدمتون قالار ذخیره دستیار اولار بقایه

ایتمروخ حضور حقده حشرده گلایه حارث

مسلم ابن عقیل آتامیز کوفه ایچره قانه باتدی

شربت شهادت ایچدی فخرله مرامه چاتدی

امتیاز آلیبدور حقدن یوخلیانلاری اویاتدی

جانمیز فدا مسلّم بیر بیله فدایه حارث

مطلقاً بونی بلورسن نفع یوخدی بس خطاده

ری هواسنه امامی ئولدوروبله کربلاده

بیر نیچه گونی یارالی پیکری قالوب آراده

خلق ایدندی قانه صاحب آند اولا خدایه حارث

الغرض نمازه یاران آلدیلار او دم اجازه

نهردن گوتوردیلر سو اللرینده دستمازه

عازم اولدولار حضور یاره دور دولار نمازه

باخدی گوردی آچدیلار اَل صدقله دعایه حارث

(( ناطقا )) ئورک مرامین عرض ایدوبله کردگاره

یازما مطلبی نه اولدی قلبلر چکر شراره

عارفه کفایت ایلر هر مکانیده اشاره

رحم ایتمدی همانا بو ایکی بالایه حارث


برچسب‌ها: محسن محمدی هشترودی ناطق
+ نوشته شده در  یکشنبه ۱۹ اسفند ۱۴۰۳ساعت   توسط حاج محمد محمد قاسمی  |