|
در وفات خانم زینب (س) یا حسین دور قبریدن گل ایله افغان شامیده آختارور زینب سنی سنسیز ویرور جان شامیده ساق صولا حیران باخار حسرتله گوز یاشین الر گوئیا یول گوزلیور ایندی ابوالفضلیم گلر یا او گلسین یا ئوزون باجی دیلین قارداش بولر آل دیز اوسته باشینی ای شاه عطشان شامیده عرض ائدیر جان اوسته یم امداده گل قارداش حسین بیر کسیم یوخدور گله فریاده گل قارداش حسین غمگسارون زینبم سال یاده گل قارداش حسین یدّی قارداشدان بیری یوخدور بو ویران شامیده کربلاده یاتموسان ترک ائتموسن بو مضطری باغریوا جان تک باسوبسان شیرخواره اصغری قویما قارداش آغلاسون ایلر اذّیت حنجری گلمه گلمه قوی حسین یالقور ویروم جان شامیده تا یتشدی جان دوداقه ویردی پایانه سوزون اسدی بیر بادِ مخالف سولدوروب گل تک یوزون سینه دن بیر آه چکدی یومدی حسرتله گوزون باغِ یثربده آچان گل ، اولدی خندان شامیده آلدی شام عورتلری نعشین آرایه بالتمام ایتدیلر بیر هلهله گویا ایدوب محشر قیام نالة وا زینبائیله دولوبدی شهرِ شام زینبه هر بیت اولوب بیر بیت الاحزان شامیده گلدی غساله که ویرسون غسلنی ایتسون کفن اللرین ناگه کنار ایتدی یارالی سینه دن گوردی باسمش باغرینا بیر پاره پاره پیرهن گزلین عشقی اولدی حضاره نمایان شامیده تاپشیروبلار عزتیله جسمینی تپراقلارا باش یارا سینه یارا گردن یارا قولار یارا زینبی عشق رقیّه چکدی گور هاردان هارا گوهر رخشان یثرب اولدی پنهان شامیده قالمادی بیر قلب زینب محنتیله دولماسین قالمادی بیر ایو بو خاتونه عزادار اولماسین هانسی عورتدی او غمده باش آچوب ساچ یولماسین ایتدیلر ایتدیقلاری توحینه جبران شامیده عزتیله ویردیلر ترتیب بزم سوگوار مجلس ترحیمینه شرکت ایدوب خورد و کبار آیة قرآن اوخوندی با کمال افتخار ساخلیوبلار زینبه شام غریبان شامیده قالمادی قارداشی تک نعشی قوم اوسته بیکفن ویرمادی باشین حسین تک نیزیه قوم فتن نیزه لرده گون کیمی گزدی امام ممتحن گاه اولوب خولی ایوینده گاهی مهمان شامیده شرق یثربدن چیخان گون ، گون به گون تاپدی زوال قتلگاه کربلاده اولدی یکسر پایمال طشت زردن ناگهان گورسندی چون تازه هلال تیره شام شامی ایتدی نوره باران شامیده بولمورم بو باشین هانسی داستانندن دیوم داش یاراسندان دیوم زخم سنانندن دیوم یا یزید بی حیانون خیزرانیندن دیوم نیلدی بیلمم دوداقیندن آخوب قان شامیده سسلدی گوردین حسین آخر یزیدین قدرتین ال ویروب سنده قبول ایتسیدین اول بیعتین درک ایدردون خلعت و تشریف و نازِ نعمتین اهل بیتین ایندی اولمازدی پریشان شامیده کربلاده صف چکوب یتمیش نفر انصاریله حاضر اولدون جنگه یوز مین لشگر خونخواریله بولمدون دین جنگ ادنمز درهم و دیناریله وار منیم تک زر ویرن قدرتلی سلطان شامیده باطلا" سس گلدی ظالم اولما خندان باشیمه گُل نثار ایلور ملائک قانه غلطان باشیمه قویموشام قانیله بیر تاج زر افشان باشیمه ایتمرم بیعت گر اولسام سنگباران شامیده دینمون قربانیم من گچمیشم دیناریدن اگمرم باش کفره عیساتک آسیلسام داریدن اوندا کی قالماز اثر بو شه نشین تالاریدن اوندا ویرام پرچم فتح فروزان شامیده خیزران ویرما دوداقیمدن گورورسن قان آخور ذکر یزدان وار گورورسن آیة قرآن اوخور شرمسار ایتمه حسینی خیردا قیزلاریم باخور بوندان آرتوخ ایتمه زینب باغرینی قان شامیده ای (( کریمی )) ویرمه الدن بو مقدس دامنی بو حسین ابن علیدور چون سخاوت معدنی ساخلا تا زینب رواقینده دیاخ بو نوحه نی یا حسین دور قبریدن گل ایله افغان شامیده برچسبها: حسین کریمی مراغه ای
+ نوشته شده در یکشنبه ۱۹ اسفند ۱۴۰۳ساعت توسط حاج محمد محمد قاسمی
|
|
درباره وبلاگ  بسم الله الرحمن الرحیم
«مَن بَکی أَو أَبکی أَو تَباکی فی مُصیبهِ الحُسین حُرِّمَت جَسَدَهُ علی النار و وَجَبَت لَهُ الجَنَّه .» ؛هرکس در مصیبت امام حسین بگرید یا بگریاند و یا ( اگر گریه اش نیامد ) خود را به حالت گریه بزند ؛ جسدش بر آتش حرام شده و بهشت بر او واجب می گردد التماس دعا حاج محمد محمد قاسمی
|
